Joresrapport vum Zenter géint Radikaliséierung Fäll vun Haassrieden hunn zougeholl

2021 goufen et zu Lëtzebuerg 49 Situatiounen vu Radikaliséierung. Dat geet aus dem Joresrapport vu respect.lu, dem Zenter géint Radikaliséierung, ervir. Viru fënnef Joer huet d'Asbl sech, op Grond vun den Attentater zu Bréissel an zu Paräis, gegrënnt - mam Zil géint d'Radikaliséierung zu Lëtzebuerg virzegoen. Am Rapport fält op, datt d'Polariséierung vun der Gesellschaft an d'Fäll vun Haassrieden - offline an online - zougeholl hunn.

Marlène Clement / rb

Symbolfoto: Kommentar zum Theema Lügenpresse op Social Media
Kommentar zum Theema Lügenpresse op Social Media (Symbolfoto). Foto: picture alliance / Thomas Trutschel / photothek.

Datt Haassrieden, Verschwierungstheorien an d'Desinformatioun zougeholl hunn, ass fir den Zenter géint d'Radikaliséierung eng Niewewierkung vun der Covid19-Pandemie. Duerch d'Kris wieren d'Leit vill eleng doheem gewiescht an hätten sech méi an de sozialen Netzer opgehalen. D'Karin Weyer, Direktesch vu respect.lu, seet:

"An de sozialen Netzer opgehalen [sinn d'Leit] oft op Informatioune getraff wat keng Informatiounen, mee Desinformatioune waren. An dann och eragezu gi sinn a Verschwierungsideologien, a Verschwierungstheorien. Wat mer dann alleguerte gesinn hunn, si Leit, déi op d'Strooss gaange sinn, wat hiert gutt Recht ass, déi awer do op der Strooss, wat net méi hiert Recht ass, do gesetzlech Grenzen däitlech iwwerschratt hunn."

Fir d'Radikaliséierung ze stoppen oder ze limitéieren, ginn et der Direktesch vu respect.lu no dräi wichteg Schrëtt: d'Präventioun, d'Berodung an d'Deradikaliséierung.

Bei der Deradikaliséierung geet et dorëms, deene Mënschen, déi eng Grenz iwwerschratt hunn, erëm eng Hand ze reechen an ze kucken, datt et net méi zu sou enger Situatioun kënnt.

"Dialog statt Hass"

Well den Hatespeech am Netz ëmmer weider zouhëlt, huet respect.lu 2020 och de Programm "Dialog statt Hass" an d'Liewe geruff. 16 Persoune goufen 2021 am Kader vun dësem Programm begleet. An deem Programm gëtt et och ee Modul mam Titel "Perspektivewiessel". Hei gi Visitte mat de radikaliséierte Leit gemaach.

Allgemeng weisen d'Zuelen aus dem Joresrapport vu respect.lu awer, datt de Risiko, datt eng Persoun sech radikaliséiert an alle Gesellschaftsschichten an an all Alter géif bestoen, seet d'Karin Weyer.

Den 22. Mee weist respect.lu am Kader vun der Präventioun am CNA zu Diddeleng d'Première vun enger Webserie, an där et em fënnef verschidde Forme vu Radikaliséierung geet.

An der Mediathéik:

Magasinn / / Marlène Clement
Lauschteren

Méi zum Thema

Karin Weyer
Falschmeldungen

Besonnesch an enger Zäit, an där d'Leit net méi vill sozial Kontakter hunn an ëmsou méi am Internet ënnerwee wieren, wier et wichteg, sech net vu Fake News anhuelen ze loossen, seet d'Direktesch vu respect.lu, d'Karin Weyer.

Net verpassen

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen