Impfcampagne Impfungen: Déi meescht Niewewierkungen "net schlëmm"

D'Niewewierkungen no enger Corona Impfung zu Lëtzebuerg waren an den allermeeschte Fäll bis elo net schlëmm. Dat geet aus engem neie Rapport vun der Santé ervir. Bis elo hätt och keen direkte Lien kënnen etabléiert ginn tëscht engem Stierfall an enger Impfung.

Pierre Reyland / cbi

BioNTech/Pfizer-Impfstoff
De BioNTech/Pfizer-Impfstoff. Foto: picture alliance/dpa/dpa-Zentralbild | Stephan Schulz

Lauschteren


An hirem drëtte Rapport iwwer d'Impf-Niewewierkungen analyséiert d'Division de la pharmacie et des médicaments vun der Santé méi genee d'Period tëscht dem 14. Mee an dem 11. Juni - si kënnt awer och nach emol op all d'Fäll vu Niewewierkungen zanter dem Ufank vun der Impfcampagne am Januar zeréck.

Eng éischt Statistik ass déi heiten: Bei iwwer 423.000 administréierten Dosisse wieren am Ganzen 1.444 Fäll vu Niewewierkungen deklaréiert ginn - dat entsprécht 0,38 Prozent. A vun den deklaréierte Fäll wieren déi allermeescht - nämlech 83 Prozent - Niewewierkungen, déi ze erwaarde sinn, wéi Féiwer, Péng um Aarm, Kappwéi oder Middegkeet, an déi no e puer Deeg nees verschwonne sinn. An 176 Fäll ware Geimpfter kuerz krank geschriwwen oder konnten net eraus goen, mee si hunn net missen an d'Klinik. Bei 50 Fäll war awer eng Hospitalisatioun néideg.

Keen direkte Lien mat Stierffäll

Wat d'Stierffäll ugeet, kann der Santé no weider keen direkte Lien gezu ginn, tëscht dem Dout vun enger Persoun, an enger Impfung. Zanter dem 1. Januar gouf et bis elo hei am Land siwe Stierffäll no enger Impfung - dovun zwee nei Fäll tëscht dem 14. Mee an 11. Juni. Do hätt et sech ëm zwou eeler Frae gehandelt - vu 92 respektiv 70 Joer - eng gouf mam Vaccin vu BioNTech/Pfizer, an déi aner mat deem vun AstraZeneca geimpft. D'Santé betount: a béide Fäll hätten déi Betraffe scho méi grav Virerkrankunge gehat, an et géif e puer méiglech Doudesursaache ginn. E Lien tëscht dem Dout an der Impfung kéint och hei net nogewise ginn.

Bei dräi Persoune gouf an där analyséierter Zäit-Period tëscht Mee a Juni de Prognostique vital no enger Impf-Reaktioun engagéiert - do huet also Liewensgefor bestanen. Hei hätt et sech ëm dräi Fraen tëscht 41 an 72 Joer gehandelt - bei enger, déi mat BioNTech/Pfizer geimpft gouf, war d'Reaktioun am Kontext vun enger Panikattack. Bei där zweeter, och mat BioNTech/Pfizer geimpft, war et zwee Méint no der zweeter Dosis, e vasculaire Problem, mee keng Thromobopénie. An bei der drëtter war e ee recidiven Problem, dee scho virun der Impfung bekannt war.

Allgemeng betount d'Santé am Rapport och nach: d'Analys vun den Impf-Niewewierkungen zu Lëtzebuerg hätt kéng nei Risikosignaler detektéiert. Bei deene véier Vaccinen, déi hei am Land agesat ginn, wieren d'Virdeeler deemno weider méi grouss ewéi d'Risiken.

Méi zum Thema

D'Paulette Lenert an de Xavier Bettel
Verlaf vun der Pandemie

Den Johnson&Johnson-Vaccin wäert zu Lëtzebuerg ouni Altersbeschränkunge benotzt ginn, esou de Premier Xavier Bettel haut nom Regierungsrot. D'sanitär Situatioun wier weiderhi stabel: et kéint een deemnächst mat neie Lackerunge rechnen.

Impfung
Froestonn

D'Impfunge géint den neie Coronavirus kommen. Vill Leit hu Bedenken, well d'Impfstoffer esou séier entwéckelt goufen. De kompletten Interview mam Thomas Dentzer a Gérard Schockmel fannt Dir elo hei.

Net verpassen

Programm

Dossieren

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen