EU-Tierkei-Accord "Eng krank Iddi"

D'EU-Tierkei-Ofkommes, dat vum 4. Abrëll u gëlle soll, grenzt dem Heinz Patzelt no u Mënschenhandel. Well fir all Syrer, deen d'EU legal aus der Tierkei ophëlt, misst als éischt een anere Mënsch op eng griichesch Insel flüchten, an ofgewise ginn. Dat wier eng "därmoosse krank Iddi", datt se just scheitere kéint. Den Tauschhandel mat der Tierkei wier absurd. Datt eng Limit vun 72.000 Mënsche genannt gouf, déi d'EU bereet ass iwwer dëse System opzehuelen, wier "onvirstellbar peinlech".

Déi sougenannten "Hotspots" op den Inselen nennt den Heinz Patzelt Retentiounszentren, wou ee Leit festhält a se ouni Prozess nees zréckschéckt. Dat géif un däischter Zäiten an Europa erënneren. Et wier och eng flagrant an offensichtlech Ligen, d'Tierkei als séchert Hierkonftsland anzestufen. "Wien d'Flüchtlingsversuergung un de systematesche Mënscherechtsverletzer Erdogan delegéiere wëll, begeet selwer virsätzlech schwéier Mënscherechtsverletzungen", sou d'Aschätzung vum Jurist a laangjähregen Amnesty-Mataarbechter.

Panik viru Populisten

Nodeems en Avis fir d'éisträichesch Regierung dës Woch zum Schluss koum, datt Flüchtlingsquote géint dat internationaalt Vëlkerrecht verstoussen, well d'sozialdemokratesch-konservativ Regierung an Éisträich elo mat enger méi séierer Prozedur d'Flüchtlingszuele limitéieren. Restriktiounen, déi dem Generalsekretär vun Amnesty International Éisträich no nëmme legal wieren, wann déi bannescht Sécherheet a Gefor ass. Spéitstens virum Europäesche Geriichtshaff géif déi Approche gekippt ginn, mengt den Heinz Patzelt am Interview. De Problem wier, datt dat ee bis zwee Joer dauert an et an där Zäit zu gravéierende Mënscherechtsverletzunge kéint kommen.

​D'Approche vun der Éisträicher Regierung wier zënter Méint déi nämlecht: "Politische Sprechblasen" an d'Welt setzen, fir eng Realpolitik ze maachen, déi sech versicht enger legaler Préiwung z'entzéien. Et wier ee "Staatsbankrott" wann d'Regierung net méi versicht, sech un d'Verfassung ze halen an d'Grondrechter ze schützen. Déi sozialdemokratesch-konservativ Koalitioun ënnert dem Bundeskanzler Werner Faymann (SPÖ) wier a Panik a géif sech vun de Populisten dreiwe loossen. D'Éisträicher wéilten hiren Undeel hunn, un all de Mënscherechtsverletzungen, déi an der EU den Ament geschéien, esou deen ironesche Constat vum Heinz Patzelt.