EU-Sommet Xavier Bettel: "Noutfalls leet Lëtzebuerg säi Veto an"

Um EU-Sommet soll décidéiert ginn, datt d'EU bis 2050 klimaneutral ass. Verschidde Staate soen awer, dat géing just mat Hëllef vun der Atomenergie. Si setze sech dofir an, datt Atomkraaftwierker duerch EU-Sue matfinanzéiert ginn. Lëtzebuerg ass do kategoresch dogéint. Wann et muss sinn, géif hie säi Veto aleeën, sot de Premier Xavier Bettel.

Danièle Weber / Serge Kesseler (Bréissel) / cz

Xavier Bettel um EU-Sommet

Um Menü vum EU-Sommet steet haut Donneschdeg de Klimaschutz an do gëtt et Divergenzen. Dat wosst de Rots-President Charles Michel an ass virsiichtshallwer virdrun an eng ganz Partie Länner gefuer, fir d'Reunioun ze preparéieren.

Säi But: D'Staate solle sech verflichten, datt d'EU bis 2050 klimaneutral ass - datt also ënnert dem Stréch bis 2050 keng klimaschiedlech Gaser méi aus der EU an d'Loft geblose ginn.

Den tschechesche Premier Andrej Babis setzt sech dofir an, datt de Bau vun Atomkraaftwierker muss finanziell vun der EU ënnerstëtzt ginn. Anescht kéint dat Klimazil net erreecht ginn.

Lëtzebuerg ass domat net d'accord. "Fir mech kënnt et net a Fro, datt Atomenergie mat europäesche Gelder finanzéiert gëtt", esou de Premier Xavier Bettel de Mëtteg zu Bréissel. Noutfalls géif Lëtzebuerg hei ee Veto aleeën. Et géif ob dësem Sommet drëm goen, fir gemeinsam Ziler an Ambitioune festzeleeën. Atomenergie wier net sécher an et géife Problemer mam Offall ginn. Dofir wiert de lëtzebuegesche Premier sech dogéint, datt Atomenergie an Zukunft mat ëffentleche Gelder soll ënnerstëtzt ginn.

Um leschte Sommet am Oktober war ee sech iwwert d'Klimaziler net eens ginn, an och elo sinn nach ëmmer dräi Länner net mat u Bord. Dat sinn Ungarn, d'Tschechesch Republik a Polen. An de Conclusioune vun dësem Sommet, déi eis virleien, geet Rieds dovun, datt et ee seriöen Challenge ass, d'Klimaneutralitéit ze erreechen - an et ass kloer, datt déi, déi retizent sinn, hei op Ausgläichsmesurë wäerte pochen. Déi Diskussioun wäert dann och bis an déi vum Europäesche Budget areechen. Si steet den Owend um Programm.

EU-Budgetskader: Keng Léisung a Siicht

Am Sträit iwwer den EU-Budgetskader fir d'Joren 2021 bis 2027 rechent de Xavier Bettel op dësem EU-Sommet net mat engem Accord. "Ech gesinn de Moment e Budget, dee mir net passt", sou de Premier de Mëtteg zu Bréissel. De Moment wier et keen zukunftsorientéierte Budget.


De Xavier Bettel


Mam Kompromëss-Virschlag vun der finnescher Presidence ass de Lëtzebuerger Premier net zefridden. Helsinki hat proposéiert, datt all Staat 1,07 Prozent vu senger Wirtschaftsleeschtung fir den EU-Budget soll abezuelen.

Wann ee sech op dësem Sommet net eens gëtt, da soll den neie Rots-President Charles Michel d'Mandat fir bilateral Gespréicher kréien, fir duerno zu engem Accord ze kommen, hofft de Xavier Bettel.

Méi zum Thema

De Rot vun der Europäescher Unioun
EU-Budget 2021 - 2027

D'EU-Länner si sech guer net eens doriwwer, wéi héich den nächsten Budget vun der Europäescher Unioun soll sinn. De Sträit ass voll am Gaang a riskéiert um EU-Sommet ze eskaléieren.

EU Budget
EU-Budget

Um EU-Sommet gëtt iwwert de Budget nom Brexit diskutéiert. Muss méi an d'Keess abezuelt ginn? Net jiddereen ass domat d'accord. Lëtzebuerg ass net prinzipiell dogéint, seet de Pierre Gramegna.

Günther Oettinger EU Kommissär fir de Budget
EU-Budget

D'EU diskutéiert iwwert de Budget vun 2020 un. Déi eng wëlle méi ee grousse Budget, déi aner de Contraire. Kloer ass, datt wéinst dem Brexit muss gespuert ginn an datt méi Sue fir grouss Projeten gebraucht ginn.

Two Female Accountants Counting On Calculator
EU-Budget

D'EU huet een eegene Budget vu ronn 150 Milliarden Euro d'Joer. Wa Groussbritannien aus der EU erausgeet, gëtt et ee Lach. Wou kann an Zukunft gespuert ginn?

 

Net verpassen

Programm

  • Panorama

  • On air

    Virum Dag vu 6 bis 10

  • Noriichten

  • Sot emol

  • Iwwer Mëtteg vun 11 bis 2

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen