Um Kierchbierg Demonstratioun virum Europäesche Geriichtshaff

Virum europäesche Geriichtshaff ass de Moien um hallwer 10 eng gréisser Manifestatioun virgesinn. Eng 2.000 Manifestanten aus Polen ginn erwaart. Hannergrond ass en Urteel vum europäesche Geriichtshaff, dat indirekt festgehalen huet, datt déi polnesch Kueleminn zu Turow soll zougemaach ginn. Polnesch Gewerkschaftler si rosen iwwert d'Urteel.

Isabel Scott / cbi

Europäesche Geriichtshaff
Virum Europäesche Geriichtshaff soll et zu enger gréisserer Demonstratioun kommen. Foto: picture alliance/dpa | Arne Immanuel Bänsch

Lauschteren


D'Kueleminn zu Turow op der Däitsch-Tschechescher Grenz hat eng Verlängerung vun hiren Aktivitéite gefrot a vun de polneschen Autoritéiten accordéiert kritt. Tschechie war net averstanen an huet virum Europäesche Geriichtshaff geklot.

D'Argument: Zanter Joren hätt Tschechien an der Grenzregioun wéinst der Kueleminn Problemer mam Drénkwaasser. D'EU huet Tschechie Recht ginn an eng Suspensioun vun den Aktivitéiten ordonéiert.

D'Kueleminn zu Turow besteet zanter 1904 a beschäftegt an direkter Linn Eng 5.000 Leit. D'Decisioun vum EU-Geriichtshaff gëtt vun de Gewerkschafte kritiséiert. Dofir demonstréiere si haut: d'Existenz vun den Aarbechter an der ganzer Regioun ronderëm Turow stéing um Spill.

D'EU als Sënnebock

Et ass déi zweete Kéier bannent kuerzer Zäit, datt Pole virum EU-Gericht onrecht kritt. Datt de Protest dowéinst en Anti-EU Protest wier, gesäit d'Ewa Buzon vu Solidarnosc awer net: et wier een net onbedéngt géint d'EU als Ganzt, mee verschidden Decisioune wieren hirer Meenung no onfair.

Geplangt ass och eng Géigemanifestatioun vu pro-europäesche polnesche Bierger zu Lëtzebuerg. D'Izabela Milewska ass der Meenung, datt am Sträit ronderëm d'Kueleminn d'polnesch PIS-Partei d'EU als Sënnebock benotze géif. De Gros vun der Onzefriddenheet wier d'Resultat vun enger populistescher Approche vun der polnescher Regierung, mee och vun de Gewerkschaften. Si géifen dem europäesche Geriichtshaff d'Schold fir d'Feeler vun der polnescher Regierung ginn, mengt d'Izabela Milewska.

Si wier net per se fir d'Fermeture vun der Kueleminn, esou d'Izabela Milewska. Mee si plaidéiert éischter fir nei Verhandlungen tëscht der tschechescher an der polnescher Regierung fir Léisungen ze fannen.


Wéinst der Manifestatioun si vill Stroosse gespaart - d'Police ass mat iwwer 840 Polizisten op der Plaz a wäert iwwer Twitter reegelméisseg informéieren. Et sinn och eng Partie Stroosse gespaart a Busser ginn ëmgeleet. Méi Informatiounen ginn et um Site vun der Police. Um Site vum ACL kann een iwwer Webcam de Stroossendeel Philharmonie-Rout Bréck am A behalen.

Méi zum Thema

De polnesche Premier Mateusz Morawiezki um EU-Sommet am Oktober 2021
EU-SOMMET

De polnesche Premier Mateusz Morawiecki krut gëschter um EU-Sommet Géigewand ze spieren. Et huet sech awer keng Tendenz fir eng adequat Reaktioun op dat ëmstriddent Urteel vum polnesche Verfassungsgeriicht rausgeschielt.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen