Chamber- a Gemengewahlen Chamberwahlen - wéini?

Am geplangte Gesetzprojet iwwer d'Ännerungen um Wahlgesetz proposéiert d'Regierung fir d'Chamberwahle vun elo un ëmmer am Oktober z’organiséieren, amplaz - wéi bis virun den Neiwahle vun 2013 üblech - am Juni. Dat géif awer bedeiten, datt all puer Joer Chamber- a Gemengewahlen op deen nämmlechten Datum géife falen. Fir dat ze verhënneren, sollen d’Gemengewahlen an deene Joren ëmmer ëm e puer Méint no vir geréckelt ginn, esou d’Propose. Eng éischte Kéier wier dat 2023 de Fall.

"Mir waren eis eens"

Dem CSV Député-Maire Laurent Zeimet no wier et besser d'Legislatur vun 2023 ze verkierzen - amplaz d'Mandat vun den zukünftege Gemengeréit. Dem LSAP-Fraktiounschef Alex Bodry no, ass déi Fuerderung awer contraire zu deem, wat an der Institutiounskommissioun diskutéiert gi wier. Et wier schliisslech an Institutiounskommissiounen iwwer d'Datumer vun de Chamberwahlen diskutéiert ginn. Do wier och den CSV-Fraktiounschef Claude Wiseler derbäi gewiescht. "Do ware mir eis viru laange Méint eens ginn, datt mir an deem Rythmus vum Oktober bleiwen, wat d'Chamberwahlen ugeet. Dat war de generelle Konsens mat der CSV." Dofir ass den Alex Bodry iwwerrascht, iwwer d'Kritik vum Laurent Zeimet an de Revirement, dee sech bei der CSV géif ukënnegen. "Ech froe mech, ob do déi lénks Hand weess, wat déi Riets mécht."

D'Mandat vun der Regierung ass duerch d'Verfassung op fënnef Joer festgeluecht a kéint deemno net, wéi d’CSV fuerdert, verkierzt ginn. Och déi gréng Fraktiounscheffin Viviane Loschetter verweist dorop, datt ee sech iwwer den Hierscht Rendez-Vous eens war. Dem Laurent Zeimet seng Ausso ass an hiren Aen op eng "parteipolitesch Kreativitéit" zréckzeféieren.

Mandat reduzéieren

Dem lénken Deputéierte Marc Baum no géif awer och d’Propose vun der Regierung den zäitleche Problem vun de Gemengen- a Chamberswahlen net léisen. déi Lénk hätte proposéiert fir d'Mandat vun de Gemengewahle vu sechs op fënnef Joer ze reduzéieren. Dat wier méi demokratesch a méi Leit hätten d'Méiglechkeet, hir Gemengeféierung wielen ze goen. "Et géif een all deene Problemer aus de Féiss goen, datt Gemengen- a Parlamentswahle géife matenee kollidéieren."

De Marc Baum seet, hie wéilt dës Propose demnächst an der Institutiounskommissioun thematiséieren. De Gesetzprojet iwwer d'Ännerung am Wahlgesetz ass nach net deponéiert.