Flüchtlingen "Appell u privat Wunnengsbesëtzer kee grousse Succès"

Et géif net um Wëlle vun deenen engen oder anere leien. Mee d'Offer um Wunnengsmaart a fir Sproochecourse géif net duer goen, fir d'Integratioun vu Mënsche mam Flüchtlingsstatut virun ze bréngen. Dat seet d'Catia Santi, Assistante sociale beim neie Service LISKO vum Roude Kräiz.

Michel Delage

Catia Santi
Catia Santi

De "Lëtzebuerger Integratiouns- a Sozialkohäsiounszenter" (LISKO) gouf am Abrëll gegrënnt an am Juni offiziell ageweit. Unerkannte Refugiéen hëllefen, sech hei am Land een neit Liewen opzebauen, ass d'Missioun vun deem Service vun der Croix-Rouge. Déi eelef Assistantes sociales hu bis elo ongeféier 270 Dossiere behandelt, woubäi een Dossier enger Eenzelpersoun oder enger Famill entsprécht, erkläert d'Catia Santi.

Am Interview mam Pierre Reyland huet d'Sozialaarbechterin op d'Schwieregkeete vun hirer Aufgab opmierksam gemaach. "Et gëtt op alle Fronte versicht, de Leit entgéint ze kommen an och se opzefänken, do wou se sinn, an dee Moment, wou se ukommen". Ugefaange bei der Sprooch. Mat ville Flüchtlinge kéint een Englesch, Franséisch oder Däitsch schwätzen. Fir Arabesch hätt een Interpreten, awer keng fir Ethiopesch.

Refugiéë bréngen net all déi selwecht Viraussetzunge mat

D'Offer u Sproochecourse géif net duer goen, trotz de villen Initiativen och vu Fräiwëllegen, der Œuvre nationale de secours Grande-Duchesse Charlotte oder och der Moschee vu Bouneweg. Fir déi, déi dann eng Plaz fonnt hunn, wier et och net ëmmer einfach. D'Leit géifen ënnerschiddlech Niveauen u Sproochekenntnisser matbréngen, verschiddener missten dat laténgescht Alphabet iwwerhaapt emol léieren, sou d'Catia Santi.

De Flüchtlingen hëllefen, méi autonom ze ginn, dat ass - nieft der Sprooch - virun allem och d'Sich no enger Aarbecht (fir aus dem RMG eraus ze kommen) an no enger Wunneng. Beim LISKO géif dat a Gruppenaarbecht geschéien, verschiddener géifen och selwer eng Schaff fannen. "Leit mat Diplomer hunn et heiansdo méi einfach. Zum Beispill e Comptabel, deen nëmmen Englesch kann, huet och gutt Chancen, hei eng Aarbecht ze fannen", erkläert d'Catia Santi. Méi schwéier hätt et dogéint eng Kannerpsychologin, déi nëmmen Arabesch kann.

"RMG en Handicap um private Wunnengsmaart"

Den RMG fir eng erwuessen Eenzelpersoun läit zu Lëtzebuerg bei ongeféier 1.350 € de Mount. Fir eng Wunneng "huet den Eenzelen et heiansdo vläicht méi einfach, fir eppes ze fannen, an engem Zëmmer oder iwwert engem Café". De soziale Wunnengsmaart wier iwwerlaf, sot d'Sozialaarbeschterin beim LISKO. Bei der Agence immobilière sociale stéingen de Moment 600 Familljen op der Waardelëscht. Bei der "Wunnéngshëllef" (an där d'Roud Kräiz Member ass) géifen et Léisunge ginn - "fir deen een oder aneren". Allerdéngs nëmmen Iwwergangsléisungen fir dräi Joer.

Wéi ee Resultat hat bis elo den Appel u privat Proprietairen? "Am Fong kann een net soen, datt mer do grousse Succès hunn", stellt d'Catia Santi fest. D'Besëtzer hätten hei am Land keng Problemer, fir Locatairen ze fannen. Des weidere wier um private Marché den RMG en Handicap. Als Proprietaire hätt een et "ganz schwéier", Leit mat RMG eng Wunneng ze ginn. "Well se einfach Angscht hunn, wa se hire Loyer net kréien oder Schued an der Wunneng gemaach ginn ass". De "revenu minimum garanti" kéint een net saiséieren. Dowéinst wier de LISKO amgaangen, u Projeten ze schaffen, fir de Proprietairë bei der Ofsécherung entgéint ze kommen.

"Containerdierfer" kéinten zu anerer Form vun Exklusioun féieren

An de "foyers de premier accueil" géifen dann Enkpäss entstoen: unerkannte Refugiéë kommen net eraus, nei Flüchtlinge réckelen no. "Et gëtt och Drock gemaach op d'Leit, fir se eraus ze kréien", sou d'Catia Santi. Mee "wann hannendrun näischt ass, ass et och schwéier". Dobäi kéime psychologesch Problemer: "Wat d'Leit méi laang an de Foyersen hänken, datt se méi demotivéiert sinn". D'Sozialaarbechter missten se dann nees motivéieren.

Bréngen d'"Containerdierfer", déi 2017 zu Zolver, Esch, Mamer a Stengefort sollen entstoen, déi néideg Entlaaschtung? "Mir mussen elo kucken, datt dat keng Dauerléisung gëtt, an domat erëm eng aner Form vun Exklusioun entsteet". Fir d'Assistante sociale vum LISKO géif eng Léisung dacks aner Problemer mat sech bréngen. "Als Sozialaarbechter si mer gewinnt, datt mer einfach mat klenge Schrëtt, par rapport zu deem, wat kënnt, schaffen".

An der Mediathéik:

Invité vum Dag / / Pierre Reyland
Lauschteren

Méi zum Thema

Weilerbaach
Flüchtlingen

Flüchtlinge mam Statut hunn déi selwecht Rechter a Flichten, wéi all déi aner Residenten zu Lëtzebuerg. An domat kréie si och déi selwecht Problemer. Een dovun heescht "Wunnengsmaart".

Nidderanwen Talbot.JPG
Konscht

Dräi Kënschtler, dräi Stiler, dräi Länner. D'Kulturhaus vun Nidderaanwen weist Wierker vun Artisten aus Syrien, dem Iran an dem Irak: "L'art, un langage universel".

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

Dossieren

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

  • Olympesch Spiller 2021

    D'Olympesch Spiller fannen, mat engem Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen