Communiqué vun der Doktesch-Associatioun AMMD: Gesondheetsministesch hätt hir Credibilitéit verluer

D'Diskussioun ëm déi radiologesch Privatpraxis zu Gréiwemaacher gëtt ëmmer méi gëfteg: d'Paulette Lenert hätt hir politesch Credibilitéit verluer, schreift d'AMMD de Moien an engem ganz schaarfe Communiqué. De Maurice Molitor huet mam President vun der Associatioun vun den Dokteren an Zänndokteren geschwat.

Maurice Molitor / rb

Alain Schmit AMMD
Den Dokter Alain Schmit ass President vun der AMMD. Foto: Archiv.

Lauschteren


Déi juristesch Argumentatioun vun der Gesondheetsministesch wier "farfelue": Ze soen, de Betrib vum IRM um Potaschbierg wier illegal, ass ganz einfach falsch, seet d'AMMD.

Mee net just dowéinst hätt d'Paulette Lenert hir Glafwierdegkeet verluer: am Communiqué vun der Doktesch-Associatioun geet och nach rieds vun "onerlaabtem Drock", vun "Intimidatioun" esouguer, deen si op de Centre médical Potaschbierg gemaach hätt. Doriwwer eraus hätt d'Ministesch d'Acteuren aus dem Secteur an déi ganz Ëffentlechkeet getäuscht. Haart Virwërf, déi den Dokter Alain Schmit, de President vun der AMMD esou begrënnt:

"Wat dem Faass de Buedem ausgeschloen huet, dat ass dat wat d'Gesondheetsministesch e Freideg den Owend op RTL Tëlee gesot huet, wou si gesot huet: 'D'Acteuren hunn sech zesummegesat an hunn en Accord zesummen ënnerschriwwen. An ech si ganz frou kënnen haut matzedeelen, datt och haut am Nomëtteg effektiv eng Demande aus dem CHL bei mir eragaangen ass, fir dësen Zentrum ze iwwerhuelen.' Fakt ass, datt et deen Accord net gëtt. An do ass natierlech de Public iergefouert ginn."

Stellungnam vun der Paulette Lenert gëtt nogereecht

Dass et keen Accord géif ginn, hat jo och de Centre médical Potaschbierg scho gëschter Owend an enger kuerzer Matdeelung op sengem Site behaapt. D'Gesondheetsministesch war de Moien a Reunioune mat de Sozialpartner, an dofir fir eng Stellungnam net ze erreechen. Déi soll awer am Nomëtteg nogereecht ginn.

An och de CHL huet bis elo kuerz viru Mëtteg net op d'Froe geäntwert, ob et en Accord vum CHL mam Potaschbierg an eng Demande vum CHL beim Ministère gëtt, fir de Centre médical Potaschbierg ze iwwerhuelen... ob et déi zwou Saache ginn?

Dofir steet d'Versioun vun der AMMD am Moment emol nach onkommentéiert an onwiddersprach am Raum:

"Datt d'Ministesch higeet, an d'Onwourecht seet, dat ass en No go, dat hu mer nach ni esou erlieft. Dat gëtt et einfach net, dat kann ee sech net als Minister erlaben. D'Kapital vun der Politik ass awer d'Glafwierdegkeet - an déi ass bei eis wierklech zerstéiert."

Méi zum Thema

Paulette Lenert
IRM zu Gréiwemaacher

Den IRM um Potaschbierg géif ouni legal Basis agesat ginn, seet d'Paulette Lenert. En IRM dierft just an Zesummenaarbecht mat engem Spidol exploitéiert ginn - op déi Pist wéilt een zesumme mam radiologeschen Zenter goen.

Net verpassen

Programm

  • Virum Dag vu 6 bis 10

  • On air

    Panorama

  • Virum Dag vu 6 bis 10

  • Noriichten

  • Sot emol

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen