Kierchefabricken Syfel hëlt Bëschof a Ministeren op d'Geriicht

De Sträit bannent der Kierch spëtzt sech zou. Den Äerzbëschof refuséiert, d'Konventioun iwwert d'Basilika z'ënnerschreiwe wéinst enger Klo vun 109 Kierchefabricken an hirem Daachverband. Nieft dem Jean-Claude Hollerich sinn och den Inneminister Dan Kersch, de Kultusminister Xavier Bettel grad ewéi Staat a Regierung viséiert, sot eis den Affekot vum Syfel Jean-Marie Bauler.

Carole Schimmer, md

Jean-Claude Hollerich2.JPG
Jean-Claude Hollerich (Archiv)

De Staat soll sech jo um Ënnerhalt vun der Iechternacher Basilika, engem nationale Gebai, bedeelegen. Den Äerzbëschof Jean-Claude Hollerich awer en Donneschdeg refuséiert, mam Staat déi deementspriechend Konventioun z’ënnerschreiwen. D’Kierchefabrick vun Iechternach huet d’Plainte géint hie matgedroen.

De Syfel, den Daachverband vun de Kierchefabricken, hat scho laang mat engem Recours viru Geriicht gedreet. An zwar aus Protest géint déi grouss Konventioun iwwert eng méi grouss Trennung vu Kierch a Staat, dorënner d’Enteegnung vun de Kierchefabricken.

Kohärent, net z’ënnerschreiwen

De Generalvikar Leo Wagener erkläert d’Decisioun vum Äerzbëschof, d’Konventioun iwwer d’Basilika net z’ënnerschreiwen: “Op där enger Säit hëlt een de Bëschof an de Bistum viru Geriicht, fir eng Konventioun unzefechten. Bannent där Konventioun ass awer och virgesinn, de Statut vun der Basilika ze klären. Si wollten d’Mandat [un den Affekot vum Syfel, md] net zeréckzéien. Dofir ass eng Kohärenz do, fir net z’ënnerschreiwen.”

Déi geriichtlech Assignatioun, déi ënnert anerem un de Bistum geriicht gëtt, gouf vun 110 Kierchefabricke matgedroen. Zwee Drëttel sinn also net dobäi, seet de Generalvikar. De Leo Wagener hat Gespréicher mat der Kierchefabrick vun Iechternach. “Do ass däitlech ginn, datt déi Leit net onbedéngt en connaissance de cause’ waren, wat eigentlech dat Mandat, wat se dem Me Bauler ginn haten, bedeit.”

Statute vum zukünftege Kierchefong bal fäerdeg

Parallel schafft de Bistum, zesumme mat Membere vu Kierchefabricken an anerer, un de Statute vum zukünftege Kierchefong. Dee Fong, deen nach an der Chamber muss votéiert ginn, soll déi Kierchegebaier geréieren, déi de Bistum nach wëll behalen. D’Statute wiere “quasi fäerdeg”, sou de Leo Wagener. Et géif een och ee méi vaste "règlement d’ordre intérieur" ausschaffen, an deem d’Responsabilitéiten am Fong verdeelt ginn.

Et wier nach ze fréi, fir een definitive Bilan ze zéien iwwert d’Konventiounen, déi tëschent de Gemengen an de Kierchefabricken ofgeschloss goufen. Bis elo hätt de Bistum der 82 erakritt. Anerer, déi vun de Gemengeréit gréng Luucht kruten, wieren ënnerwee. Do wou keng Konventioun ënnerschriwwe goufen, sollen Titeren d’Besëtzverhältnisser klären.

Méi zum Thema

Lydie Polfer
Kierchefabricken

Mat zwielef Kierchefabricken ass sech d’Gemeng Lëtzebuerg eens ginn. Mee och déi aner missten akzeptéieren, datt déi meeschte Kierchegebaier der Gemeng gehéieren, sou d'Buergermeeschtesch Lydie Polfer.

Net verpassen

  • 24.01. Opruff Media & Me

    Media and Me_2022_1200x667px.jpg

    De radio 100,7 mécht och dëst Joer mat beim Projet Media & Me an Dir kënnt Iech elo dofir umellen.

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • Buchkriticken

    D'Kulturredaktioun vum radio 100,7 presentéiert Rezensioune vu Lëtzebuerger an internationale Bicher.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen