315-Milliarde-Plang: 35 lëtzebuerger Projete proposéiert
D'lëtzebuerger Regierung an d'EU-Kommissioun proposéiere 35 Projeten , déi via den 315-Milliarden-Euro-Investitiounsplang vun der Bréisseler Exekutive kéinte finanzéiert ginn. Dat geet aus dem Rapport vun engem Aarbechtsgrupp vu Memberstaten, Kommissioun an Europäescher Investitiounsbank ervir, deen d'EU-Finanzministeren haut zu Bréissel diskutéieren.
Ënnert de wichtegsten ëffentleche Projeten am Transport-Beräich ginn déi nei Zuchstreck Beetebuerg-Lëtzebuerg an de Stater Tram ernimmt. Am soziale Wunnengsbau gëtt d'Rekonversioun vun den Industriebroochen zu Diddeleng an zu Wolz proposéiert. Am Beräich vun der Energie ass et d'Energie-Effizienz bei Schoulgebaier oder d'Schafung vun enger sougenannter Klimabank. Ervir gehuewe gëtt am Rapport den Ausbau an d'Renovéierung vun Energienetzer, e private Projet vun der Firma CREOS, deen op 348 Milliounen Euro geschat gëtt.
Ee vun de Kritäre fir an d'Lëscht ze komme war deen, datt d'Projete relativ séier kéinten ëmgesat ginn.
