Gilles Roth CSV begréisst de prinzipiellen Tripartite-Accord
D'CSV begréisst generell, datt d'Regierung an d'Sozialpartner e prinzipiellen Accord fonnt hunn. Wann de Sozialdialog funktionéiert, da misst een och aus der Oppositioun eraus d'Disziplin hunn, fir dee net ze torpedéieren, esou de Gilles Roth. Hie géif awer bedaueren, datt d'Chamber net scho wärend der Tripartite méi detailléiert Informatioun iwwer déi finanziell Situatioun vum Staat krut.
Den CSV-Co-Fraktiounschef Gilles Roth huet den Tripartite-Accord de Moien op der Antenn generell begréisst: Wann de Sozialdialog funktionéiert, da misst een och aus der Oppositioun eraus d'Disziplin hunn fir dee net ze torpedéieren, esou de Gilles Roth.
D'CSV hätt sech awer trotzdeem erwaart, datt och d'Deputéiert an der Chamber gewuer gi wären op Basis vu wéi engen Zuelen an der Tripartite verhandelt gouf:
"[...] an dofir hu mer och d'lescht Woch déi Fuerderung gestallt, datt mer géifen iwwer déi finanziell Situatioun, déi de Staat de Verhandlungspartner géing virleeën. Datt och d'Chamber dat parallel kritt hätt. Dat sollt am Ufank geschéien an dunn ass op ee mol e Revirement bei de Majoritéitsparteien komm fir dat awer net ze maachen."
Et géif an déi richteg Richtung goen
Den Accord, deen d'Regierung an d'Sozialpartner en Dënschdeg den Owend fonnt hunn, geet fir d'CSV "an déi richteg Richtung". Den CSV-Fraktiounschef Gilles Roth begréisst, datt de Staat vum éischten Oktober e groussen Deel vun de Energiekäschten fir d'Bierger an d'Betriber wëllt iwwerhuelen.
Domat géif een net just Symptomer bekämpfen, mee Ursaach vun der aktueller Präisdeierecht, esou de Gilles Roth. Et hätt ee selwer virun enger Rei vu Méint schonn d'Iddi vun engem Präisdeckel an d'Spill bruecht, erkläert den CSV-Fraktiounschef:
"Deemools goufe mer e bësse belächelt, well gesot gouf: Dat ass net sozial selektiv, an dat ass mat der Géisskan. Elo kënnt een op déi Iddi do zréck. An et ass jo net just zu Lëtzebuerg, dat gëtt och an aneren europäesche Länner gemaach. An ech mengen, dofir geet et an déi richteg Richtung. Och well domat indirekt bewierkt gëtt, datt den Index-Mechanismus kann vollëmfänglech spillen."
An der Mediathéik:
LauschterenMéi zum Thema
Et gouf e prinzipiellen Accord fonnt
No 30 Stonne Verhandlungen iwwer dräi Deeg an der Tripartite gouf en Dënschdeg den Owend e prinzipiellen Accord annoncéiert: De Käschtepunkt vum Hëllefspak läit bei eppes méi wéi enger Milliard Euro.
De Stand nom zweeten Dag vun de Verhandlungen
No dem zweeten Dag vun den Tripartite-Verhandlungen gëtt et nach keen Accord. D'Negociatoune ginn haut um 10h00 weider, mat enger méiglecher Pressekonferenz scho vun 11h00 Auer un.
